„Пари“ е шведска криминалистичка драма која ги комбинира елементите на трилер, црна комедија и социјална драма. Дејствието на серијата ја следи Малу, жена од високите кругови на општеството, која живее во едно отмено предградие на Стокхолм. Откако нејзиниот живот почнува да се руши поради финансиски проблеми и деловни неуспеси, таа случајно наоѓа торба со 47 милиони шведски круни – пари кои исчезнале при еден грабеж на банка. Наместо да ги пријави во полиција, Малу одлучува да ги задржи парите и да ги користи за започнување сопствен бизнис – отворање пекара. Меѓутоа, криминалците што ја ограбиле банката си ги сакаат парите назад – а една од нив е Лијана, самохрана мајка чиј партнер завршил во затвор поради грабеж. Нејзе очајнички ѝ требаат тие пари за да обезбеди подобра иднина за себе и својот син. Кога сфаќа дека Малу ги има парите, нивните патишта се спојуваат во напнатата игра на лаги и преживување. Главните улоги ги играат Хелена аф Сандберг во улогата на Малу и Бјанка Кронлоф во улогата на Лијана.

Бјорн Урдал е поранешен бизнисмен со криза на идентитетот кој добива ненадејна можност да стане клучен продажен агент во една норвешка компанија за производство на оружје. Додека влегува во светот на воените договори, геополотичките интриги и моралните дилеми, тој набргу сфаќа дека зад профитот стојат мрачни тајни и етички компромиси. Како што тенологијата за вештачка интелигенција сѐ повеќе се интегрира во современото вооружување, Бјорн се соочува со прашањата за границите на човечката одговорност и семејните односи и притисоците на моќните интереси, па мора да одлучи дали ќе стане дел од системот или ќе се обиде да го руши однатре. Серијата се занимава со теми како што се технологиите за оружје, можните „роботи-убијци“ и улогата на Норвешка како извозник на оружје, давајќи им на гледачите материјал за размислување за современите морални прашања. Серијата ја создадоа Оле Мариус Араидсен и Николај Клев Брох, кој исто така го толкува главниот лик, Бјорн Урдал.

„Бел песок“ е данска криминалистичка серија која ги комбинира елементите на трилер, драма и мистерија и се одвива во едно идилично, но таинствено приморско гратче по име Хвиде Санде. По нерешеното убиство на младиот германски сруфер во малата туристичка заедница, локалната полиција нема доволно докази, ниту траги за да го реши случајот. За да дојдат до информации, данските власти испраќаат двајца искусни полициски детективи – Хелене Фалк, експертка за тајни операции, и Томас Бекман, искусен истражител на убиства. Тие двајцата мораат да се инфилтрираат во локалната заедница под маска на среќен брачен пар кој го напушптил големиот град во потрага по мирен живот на брегот. Меѓутоа, тоа што отпрво изгледа како едноставна задача, брзо се претвора во сложена истрага затоа што жителите на Хвиде Санде немаат доверба во странци, а злосторството крие повеќе тајни од тие што биле првично видливи.