Се работи за една од најдобрите серии на „Вијаплеј“ во која самохраната мајка Перниле, позната и како Порни, се грижи за своите две деца, внукот и татко ѝ кој минува низ бунтовна фаза. Покрај сето тоа, таа работи во социјална заштита за деца и ѝ се допаѓа окружниот адвокат Бјорнар. Оваа норвешка хит-драма зборува за сите дилеми во кои ќе се најде човек кога сака да ја направи вистинската работа: прво за своите најблиски, а потоа за себе. Приказната е многу добра и лесно е да се поистоветите со неа, ликовите имаат длабочина, дејството не е површно, а ситуациите се реални и исти низ кои поминуваат и самите гледачи. На навистина одличен начин, серијата претставува портрет на модерното норвешко семејство кое поминува низ среќата, тагата и целиот спектар на емоции преку кои и ние зачекоруваме во реалните односи меѓу луѓето. Глумата е врвна, со одлична хемија помеѓу актерите, со акцент на Хенриете Стинструп и Нилс Оле Оф.

Криминалното семејство Кинсела од Даблин сè повеќе се судира со нарко-картелот на Канингемови, а ситуацијата посебно ескалира кога вжештениот син на Френк Кинсела влегува во насилен конфликт со еден од луѓето на Имон. Серијата е многу интензивна, решителна, модерна и паметно напишана и на многу добар и вистински начин ги прикажува криминалните семејства од Даблин. Квалитетот на камерата и продукцијата се врвни, а мрачната атмосфера создава напнатост. Најголемиот плус на серијата веројатно се неговата реалистичност и уверливост, каде што влоговите изгледаат реални, семејната динамика и карактерните недостатоци се убедливи, а смртта има последици. Серијата освои 14 номинации и 9 победи на ИФТА и секако има причина да се најде на списокот на топ-серии во 2024 година.

Серија која на исклучителен и искрен начин прикажува емоционално вознемирувачки ситуации. Приказната ја следи автодеструктивната Вивиен која открива дека имотот на гребенот што го наследила од дедо ѝ всушност е место на многу самоубиства, поради што таа ја наследува и задачата да стане негова чуварка и да ги спасува изгубените души на работ. Промислена, силна тематика која ги прикажува семејството и пријателите со сите нивни несовршености на нивното патување да бидат сакани и да станат целосни. Дејството спротивставува напнати и комични елементи, актерската екипа е одлична, а сите ликови на некој начин се скршени и изгубени. Сепак, до крајот секој од нив го прави својот целосен круг.

Од авторката на легендарната „Пипи Долгиот Чорап“ доаѓа приказната за едно љубопитно девојче родено во банда разбојници во средновековна Скандинавија. Како што расте, Роња го истражува светот околу себе, полн со магија, опасност, но и необични суштества. На нејзините талкања во нордиските шуми, таа го запознава момчето Бирк, чиј татко е исто така водач на банда. Прекрасна адаптација со магичен приказ на околината, одлична музика и автентични ликови, а ако сте обожавател на оригиналниот филм од 1984 година, можеби новата верзија ќе ви биде уште подобра.

Сместена во 60-тите и 70-тите години во Оксфорд, серијата ја следи раната кариера на Ендевор Морз. Работејќи заедно со својот постар партнер, истражителот Фред Турсдеј, Морз е вклучен во бројни истраги, а сите љубители на британската криминалистичка продукција ќе знаат дека се работи за еден вид “приквел“ на легендарната серија „Инспектор Морз“. Навистина не се работи само за уште еден непотребен додаток на омилениот лик, а голем дел од успехот на серијата може да му се припише на генијалниот избор на актерот Шон Еванс, кој го дава својот печат на оваа култна улога. Морз имаше единствен квалитет, различен од сите други, а екипата од Ендевор навистина успеа да ја долови таа ДНК и да ја оживее, поради што и овој наслов мораме да го вклучиме во топ-серии во 2024 година.

Приказна која не можете да престанете да ја следите од првата до последната епизода. Не се работи само за уште една обична серија која прикажува приказни од судницата - таа детално го носи целиот процес до пресудата. Глумата е првокласна (особено Селин Бакенс), кадрите се одлични, а сценографијата е прекрасна. „Showtrial“ е многу внимателно испланирана, има добар ритам на дејството, а ликовите се мајсторски дизајнирани околу комплексноста на социјалните хиерархии. Дејството е многу забавно за следење со малку напната доза на мистерија.